El problema de come scrivare in lengòa nostrana lo gha posto anca on letore de " Quatro Ciacòe", mensile in dialeto de cultura e tradission venete.Come vien cità in febraro anca nèa rivista, la nostra region la gha messo su on sito " www linguaveneta. it" e, ancora nel 1995 quando comandava i democristiani, la gha stampà on manuale dal titolo " Grafia Veneta Unitaria ".

Mi non ghe ne farìa 'na malatia sul come scrivare. Le lengòe parlàe ( 'na ricerca dell'Unesco ghe na individuà 31 solo in Italia )  le xe come la mare de 'na sucara che tòe l'onda a seconda de dove le xe impiantà.

Quando che andavo scola ghevo on me compagno de banco da Montebèo. Par dire el nostro xeo el diseva elo. Pi tardi gho vùo  'na tosa da soto de Lonigo. Salvate cielo  con el piassè ! Epure, dopo aver ciapà on poco el bocato, con la lengòa semo andà, per on bel toco d'amore e d'accordo!

Non te digo cossa me sucedèa con on'altra tosata che vegnèa dala bassa. El problema pi difissile da capire el gera quando, nei momenti critici, con on sospiròn la me disèa: " No ! Déi ! " Mi ghe rispondevo: "  O tosa! me tùito pal sesto! Xe no, o xe déi ? "

Ma non te pare, Nane, che, dopo tante promesse, in fondo, quèo dela lengòa sia l'unico federalismo che sèmo riussìi ad avere? Le lengòe locài xi lengòe parlàe, vive, no inventàe sòa carta. El vero nemico, al di de oncò, xe l'inglese, lengòa foresta che se trovemo sempre pì tra i pìe. Anca quando te ve al cesso ( pardon, WC ! ). Nemiche xe quele mamete leghiste de San Piero che, a tuti i costi, le vòe parlare in difissile coi fiòi. " Caro, vuoi un popocorn ? vuoi un senduicce ?" Quanto iera méjo le moneghe che me fasèo da picolo sòa stùa col sorgheto moro! E che profumo gavèa el pan e salado che me ingossava! E, anca Zaia da Godega, dopo tante promesse, nei so discorsi el mete tanti paroloni inglesi: " business, ecc... " Non te digho, quando i te parla dei debiti dela region e dei altri, come i te parla in difissile. Péso de ona messa in latin! Basta! se no me scaldo, me gonfio e la meto in politica andando so dal brenton! Ma, i me gha dito che quà non se pòe meterla in quel tono parchè Mauro xe tendùo a vista e el ris-cia on altra denunsia. Altro che federalismo!